Plantun de Prouvènço

Pèr coumpara dos planto d'encò nostre

Nepeta cataria & Typha domingensis

Erbo-di-cat

Nepeta cataria

Lamiaceae Labiaceae

Àutri noum : Mento-di-cat, Amistouso, Menugueto, Mentastre.

Noms en français : Cataire, Herbe aux chats.

Descripcioun :
L'erbo-di-cat es uno planto devengudo raro que se pòu pamens trouba dins quàuqui relarg proche dis oustau (óurigino pountico). Sèmblo à Nepeta nepetella, planto coumuno de mountagno. Se n'en destrìo pamens, en mai dóu relarg, que si fueio soun mai grando (fin qu'à 6 cm).

Usanço :
Ero cultivado à passa tèms. Si fueio soun manjadisso coume sabourun e se pòu n'en faire de tisano. Se dis qu'agrado i cat...

Port : Pichoto planto lignouso
Taio : 40 à 120 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Nepeta
Famiho : Lamiaceae
Famiho classico : Labiaceae

Coulour de la flour : Blanco
Petalo : irreguliero
Ø (o loungour) flour : 15 à 17 mm
Flourido : Estiéu

Sòu : Ca
Autour basso e auto : Pancaro entresigna
Aparado : Noun

Liò : Escoumbre e proche dis oustau - Camin
Estànci : Mesoumediterran à Mountagnard
Couroulougi : Óurigino pountico
Ref. sc. : Nepeta cataria L., 1753

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.